ஷாங்காய் கூட்டமைப்பில் இந்தியாவுக்கு நிரந்தர இடம்!

மாஸ்கோ: ஷாங்காய் ஒத்துழைப்பு கூட்டமைப்பில், இந்தியாவை நிரந்தர உறுப்பினராக்க ஆதரவளிப்போம் என்று ரஷ்ய வெளியுறவுத் துறை அமைச்சர் செர்ஜி லாவ்ரோவ் தெரிவித்தார். இந்திய வெளியுறவுத் துறை அமைச்சர் எஸ்.எம்.கிருஷ்ணா ரஷ்யா வந்துள்ளார். மாஸ்கோவில் ரஷ்ய வெளியுறவுத் துறை அமைச்சர் செர்ஜி லாவ்ரோ - கிருஷ்ணா இருவரும் சந்தித்து, பல்வேறு துறைகளில் இருநாட்டு ஒத்துழைப்பு, ஈரான் அணுஉலை பிரச்னைகள், ஆப்கானிஸ்தானில் தீவிரவாதிகள் தாக்குதல் உள்பட பல முக்கிய விஷயங்கள் குறித்து பேச்சுவார்த்தை நடத்தினர். 

பின்னர் நிருபர்களுக்கு அளித்த பேட்டியில் செர்ஜி கூறுகையில், ஷாங்காய் ஒத்துழைப்பு கூட்டமைப்பில் தற்போது இந்தியா பார்வையாளர் அந்தஸ்தில் மட்டுமே உள்ளது. இந்த கூட்டமைப்பில் இந்தியாவை நிரந்தர உறுப்பினராக்க ரஷ்யா ஆதரவளிக்கும் என்றார். ஷாங்காய் கூட்டமைப்பில் சீனா, ரஷ்யா, கசகஸ்தான், கிர்கிஸ்தான், தஜிகிஸ்தான், உஸ்பெகிஸ்தான் ஆகிய நாடுகள் அங்கம் வகிக்கின்றன. 

இந்தியா, பாகிஸ்தான், மங்கோலியா, ஈரான் ஆகிய நாடுகள் பார்வையாளர் என்ற அந்தஸ்தில் உள்ளன. இந்நிலையில் ஷாங்காய் கூட்டமைப்பில் நிரந்தர உறுப்பினராக்க வேண்டும் என்று 10 ஆண்டுகளுக்கும் மேலாக இந்தியாவும் பாகிஸ்தானும் வலியுறுத்தி வருவது குறிப்பிடத்தக்கது. கிருஷ்ணா கூறுகையில், ஆப்கானிஸ்தானில் ஜனநாயகத்தை உருவாக்க இந்தியாவும் ரஷ்யாவும் தேவையான உதவிகளை செய்யும் என்றார்.